Svala og Einar reka nýja búð

Parið Svala Björgvinsdóttir og Einar Egilsson sér um rekstur Popp, nýrrar „second hand"-búðar sem verður opnuð í dag undir sama þaki og Spúútnik, Elvis og Rokk og rósir hafa sameinast undir. „Þetta er gjafavöruverslun, þó við séum með fatnað líka. Það er hægt að kaupa allt í búðinni, frá gardínunum til ljósakrónanna," sagði Svala.

Fatnaðurinn mun bera meiri keim af götumenningu en í hinum búðunum. „Við verðum með nýja strigaskó og nýjar fatalínur frá New York. Það sem er í búðinni núna er forsmekkurinn að því."

Popp er frumraun þeirra skötuhjúa í búðarrekstri. „Þetta er glænýtt fyrir okkur bæði," sagði Svala. „En þetta er ótrúlega gaman, það er frábært fólk að vinna hérna og mikil sköpunargleði í gangi." Á meðal samstarfsfólks þeirra Svölu og Einars er Krummi, bróðir Svölu, sem vinnur í Elvis.

„Það var líka ein ástæðan fyrir því að ég var til í þetta. Hann er búinn að vera að vinna hérna og finnst það frábært. Fullt af fólkinu sem vinnur hér er líka í músík og listum, eins og ég og Einar sem erum náttúrulega bæði í Steed Lord," sagði Svala. Henni hefur meira að segja tekist að samræma tónlistina og búðarreksturinn. „Við vorum að spila í New York og Miami um daginn og náðum að kaupa inn dót fyrir búðina í leiðinni. Þetta smellpassar saman," sagði hún.