Undarleg árátta fólks að þurfa að segja mér hvað hundurinn er ljótur

„Mér finnst hún fallega ljót," segir Sigríður Jónsdóttir hundaeigandi um tíkina Foxy sem er tæplega eins árs. „Eiginlega finnst mér hún ótrúlega sæt. Hún er mikill karakter, alltaf glöð og fólk sér mjög fljótlega í gegnum ljótleikann," segir Sigríður og hlær.

Fréttablaðið hafði samband við Sigríði vegna ábendinga um að Foxy væri sláandi lík hinum bandaríska Elwood, en sá hlaut titilinn ljótasti hundur heims á dögunum. „Já, ég hef fengið að heyra að hún sé lík honum. Ég tek því nú ekki persónulega en finnst undarleg þessi þörf hjá fólki að tilkynna mér hvað hundurinn minn sé ljótur. Það passar sig líka alltaf að ég heyri örugglega athugasemdirnar sem eru oft frekar óþarfar."

Í ljós kemur að hundarnir tveir eiga ýmislegt sameiginlegt annað en sérstakt útlitið. Elwood er blanda af kínverskum faxhundi og chihuahua. Það er Foxy líka auk þess sem í henni leynist japanese chin. Þess má geta að langflestir keppendur um titilinn ljótasti hundur heims voru kínverskir faxhundar en tegundin er að mestu hárlaus og með kamb á höfði.

Elwood og Foxy eiga það einnig sameiginlegt að hafa verið bjargað af eigendum sínum, en til stóð að lóga hinum fyrrnefnda vegna ljótleikans. Það var ekki alveg svo slæmt með Foxy. „Hún datt eiginlega upp í hendurnar á mér," segir Sigríður. „Fyrri eigendur gátu ekki haft hana lengur og ég ákvað að taka hana að mér."

Fleiri hundar hafa dottið upp í hendur Sigríðar en auk Foxy á hún tvo hunda af gerðinni stóri dan, en tegundin er sú stærsta í heimi. Hún segir það ekki auðvelt að ferðast um allt með þrjá hunda. „Það er hörkuvinna að vera með svona marga hunda.

Sérstaklega þegar þeir eru svona misstórir enda fer maður til dæmis ekki með þessa þrjá í eins göngutúra, Foxy fer ekki ótroðnar slóðir á meðan hægt er að fara með hina nánast hvert sem er. Annars kemur þeim öllum mjög vel saman og Foxy hjálpar líka til. Hún þrífur augun í þeim stærri og sér um að þrífa upp í kringum diskana þeirra þegar þeir eru búnir að borða."