Sprengjuhótun í Moskvu

„Það fór aðeins um okkur,“ segir Birgir Þórarinsson liðsmaður Gus Gus, en sveitin varð fyrir heldur óskemmtilegri lífsreynslu í Moskvu um helgina. Hljómsveitin átti að spila í vöruskemmu frammi fyrir sex þúsund manns þegar ljósin í húsinu voru kveikt og rödd bað alla gesti um að fara út. Hafði þá tónleikahöldurum borist sprengjuhótun en ekki er ljóst frá hverjum hún var.

Hótunin kom aðeins tíu mínútum áður en Gus Gus átti að stíga á stokk. Birgir vildi hins vegar ekki meina að henni hefði verið beint gegn sveitinni. Eftir að húsið hafði verið fínkembt og lögreglan leitað af sér allan grun um að enga sprengju væri að finna héldu tónleikarnir áfram eins og ekkert hefði ískorist. „Reyndar voru þarna nýorðnar mæður sem voru ekki alveg rónni og ekki sannfærðar um ágæti leitarinnar. Við höfum hins vegar ýmsu vanir og teljum okkur nú hafa lent í svaðalegri hlutum,“ bætir Birgir við og rifjar upp æði spennuþrungna flugferð sveitarinnar með rússneskri rellu frá Mosvku til Siberíu. „Þá vorum við alveg sannfærð um að þetta væri okkar síðasta,“ segir Birgir sem vonaðist einna helst til að græjurnar þeirra myndu skila sér aftur.

Gus Gus hefur verið á ferð og flugi að undanförnu og spilaði meðal annars á hinni bresku Glastonbury. Eins og komið hefur fram var úrhellisrigning nánast allan tímann og allt svæði eitt forarsvað. „Og sú ferð hófst reyndar ekkert alltof vel því rútan okkar bilaði og ferðaplan fór úr böndunum,“ segir Birgir.

„Þegar við síðan komum á svæðið þá var úrhellisrigning allan tímann. En þegar við byrjuðum að spila þá tók sólin uppá því að fara glenna sig og Stebbi Steph bað alla um að rífa sig uppá rassgatinu og hrista á sér skrokkinn,“ segir Birgir sem taldi þetta vera eina eftirlætistónleika sína. „Það er nefnilega svolítið öðruvísi fyrir svona Nasa-sveit eins og okkur að leika fyrir tíu þúsund manns.“

Gus Gus er hvergi nærri hætt sínum ferðalögum þrátt fyrir svaðilfarirnar í Rússlandi. Hún stefnir ótrauð á að spila á tónlistarhátíðum í Austur-Evrópu og svo er stefnt á að fara í víking til Bretlands og Bandaríkjanna þegar hausta tekur.

f