Íslendingar keyptu byggingu í London fyrir 10 milljarða

Íslenskir fjárfestar keyptu nýverið sögufræga byggingu í Belgravia hverfinu í Lundúnum fyrir rúma tíu milljarða íslenskra króna. Húsið var upphaflega byggt sem íbúðarhús en frá lokum seinna stríðs hýsti húsið breska Rauða krossinn. Íslendingarnir hyggjast breyta húsinu í íbúðarhús að nýju og innrétta þar 14 lúxusíbúðir.

Það er fyrirtækið Zegna III Holdings sem hefur keypt húsið að því greint er frá í breska fasteignablaðinu Property Week. Í blaðinu er fyrirtækið sagt vera í eigu Íslendinga en skráð erlendis. Heimilisfang byggingarinna er 3-10 Grosvenor Crescent og keyptu Íslendingarnir eignina af fjárfestingafyrirtækinu Blackstone.

Blackstone keypti bygginguna í nóvember 2005 af fyrirtækinu Grosvenor og breska Rauða krossinum fyrir tæpa fjóra milljarða króna og hafa því ávaxtað pund sitt vel. Blackstone fékk leyfi hjá byggingayfirvöldum til að breyta byggingunni í íbúðarhúsnæði að nýju en Rauði krossinn hafði nýtt það undir skrifstofur síðan í seinna stríði. Zegna III Holdings hyggst innrétta 14 lúxusíbúðir í húsinu enda er það í einu dýrasta hverfi borgarinnar þar sem mjög fínt þykir að búa.

Búist er við að íbúðirnar, sem saman telja um sex þúsund fermetra, verði tilbúnar árið 2009.