Höfðar til barnssálarinnar

Breski tónlistarmaðurinn Jarvis Cocker les upp úr íslensku þjóðsögunni Búkollu á tónlistarsíðunni Daytrotter.com. Árni Björnsson þjóðháttafræðingur segir söguna í uppáhaldi hjá mörgum.

Cocker er fyrstur í röð þekktra tónlistarmanna sem ætla að lesa upp úr bókum á síðunni og kaus hann að segja frá ævintýrum Búkollu, sem hafa lengi verið ofarlega í huga okkar Íslendinga.

„Mér hefur alltaf fundist þetta mjög indæl saga," segir Árni Björnsson þjóðháttafræðingur. „Þetta er dálítil uppáhaldssaga hjá mörgum. Hún gengur mjög vel í krakka og þá sem halda þessu barnslega í sér. Það eru ýmsir listamenn sem segja þetta, þar á meðal tónlistarmenn. Þá er þetta eitthvað sem höfðar til barnssálarinnar eins og þegar litli drengurinn bjargast með hjálp kýrinnar," segir Árni. „Foreldrunum þótti ekki sérlega vænt um hann og hann var einmana."

Svo virðist sem ævintýrið um Búkollu, sem hefur verið þýtt yfir á ensku og japönsku, hafi snert taug í Cocker enda er stutt síðan hann hitti föður sinn í Ástralíu eftir þrjátíu ára aðskilnað. „Þótt við værum líffræðilega tengdir var þetta eins og að hitta einhvern ókunnugan," sagði Cocker um endurfundina. „Við tengdumst ekki eins og feðgar gera. Ég hafði séð fyrir mér ákveðna týpu sem ég hélt að hann væri en síðan kom raunveruleikinn í ljós. Það var mjög erfitt."

Jarvis Cocker hefur komið tvisvar hingað til lands. Í fyrra skiptið kom hann með hljómsveitinni Pulp og spilaði í Laugardalshöll árið 1997 við góðar undirtektir. Þorsteinn Kragh, sem skipulagði komu sveitarinnar hingað til lands, segir áhuga Cocker á Búkollu ekki koma sér á óvart. „Hann er mjög skemmtilegur og „intelligent" gaur og mikill húmoristi. Hann hafði alltaf mikinn áhuga á landi og þjóð og var mikið að pæla í íslenskum skáldum og músík," segir Þorsteinn. „Þessir krakkar eru langskemmtilegasta fólk sem ég hef flutt inn á mínum sautján ára ferli í bransanum."

Búkolla hefur verið íslenskum tónlistarmönnum ansi hugleikin í gegnum tíðina. Laddi söng eftirminnilega um hina baulandi Búkollu á plötunni Deió árið 1981 og Björk Guðmundsdóttir söng lagið Bú­kolla á sinni fyrstu sólóplötu sem kom út 1976.