Hreiðurgerð í þvottahúsi

Maríuerlur hafa hreiðrað um sig í þvottahúsi einu í Norðlingaholti og búa sig nú undir að koma fjórum ungum á legg. Evu Dögg Sigurgeirsdóttur brá í brún þegar hún sá þessa leynigesti sem höfðu komið sér vel fyrir á meðan hún var í burtu.

„Við erum allt í einu orðin tíu manna fjölskylda hérna í Norðlingaholtinu ef fuglafjölskyldan er talin með. Ég hef ekki notað þvottahúsið mitt mikið að undanförnu þar sem ég bý að miklu leyti hjá kærastanum og því hafði fuglinn nægan tíma. Okkur brá í brún og vorum handviss um að rotta eða mús hefði komið sér fyrir í þvottahúsinu en létti þegar við sáum maríuerluna fögru,"

Eva Dögg býr á annarri hæð og segir því enga hættu vera á að köttur eða annar óboðinn gestur raski ró fuglanna. „Okkur fannst svo sætt að fuglinn hefði komið sér þarna fyrir að við ákváðum í fyrstu að leyfa honum bara að vera. Ég hringdi svo í Húsdýragarðinn til að athuga með þetta því það kemur nú lús af þessum fuglum og mér var þá ráðlagt að henda bara hreiðrinu.

Ég hafði nú alls ekki brjóst í mér að gera það. Að lokum ákváðum við að færa hreiðrið og hætta á það að fuglinn myndi ekki koma aftur en þeir voru fljótir að taka nýja staðinn í sátt og sitja glaðir á eggjunum." Sara Ísabella Guðmundsdóttir, dóttir Evu er átta ára og eins og við er að búast var hún ekkert nema glöð yfir nýju fjölskyldumeðlimunum. „Fuglinn gerði hreiður ofan á töskunni minni," sagði hún og sagðist hlakka til að sjá ungana koma úr eggjunum.