Hommarnir hefja leik í kvöld

„Það er komin mikil tilhlökkun í hópinn. Það verður gott að geta spilað reglulega til að undirbúa sig sem best fyrir HM í haust,“ segir Hafsteinn Þórólfsson, leikmaður og talsmaður Strákafélagsins Styrmis, sem nánast eingöngu er skipað samkynhneigðum leikmönnum.

Ár er liðið frá því að liðið var stofnað en í kvöld spilar liðið sinn fyrsta opinbera leik hér á landi þegar það tekur á móti liði Henson í Utandeildinni.

„Við stefnum bara á að gera okkar besta í sumar og munum að sjálfsögðu spila til sigurs. Við vitum í raun lítið um hvar við stöndum en við munum setja okkur markmið eftir nokkra leiki í deildinni,“ segir Hafsteinn.

Þátttaka liðsins í Utandeildinni í sumar er liður í undirbúningi liðsins fyrir Heimsmeistarakeppni samkynheigðra knattspyrnuliða sem fram fer í Argentínu í september. Lið Styrmis hefur þegar farið í tvær keppnisferðir til Kaupmannahafnar og London. „Þetta er alvöru,“ segir Hafsteinn, en á meðal styrktaraðila liðsins eru Glitnir, Reykjavíkurborg, Menntamálaráðuneytið og Orkuveitu Reykjavíkur.

Mikill áhugi er hjá félagsmönnum og mæta allt að 30 manns á hverja æfingu Styrmis. Og þess ber að geta að liðið er ekki einvörðungu skipað samkynhneigðum leikmönnum. „Ætli það séu ekki um 90% af liðinu sem eru samkynhneigðir. En hjá okkur er enginn útilokaður og allir eru velkomnir á æfingar. Það eru engir fordómar hjá þessu liði.“

Fyrir áhugasama er rétt að benda á að leikurinn í kvöld fer fram á gervigrasvelli Fram í Safamýrinni og hefst kl. 20:30.