Talibanar segjast hafa fengið yfir milljarð kr. fyrir gíslana

Háttsettur meðlimur Talibana segir í samtali við Reuters í dag að þeir hafi fengið 20 milljónir dollara, eða um 1,2 milljarða kr. fyrir suðurkóreansku gíslana sem þeir létu lausa í vikunni. Jafnframt fylgir með í fréttinni að þetta fé ætli Talibanar að nota til vopnakaupa. Talsmaður forsetaembættis Suður-Kóreu segir þetta vera rangt og að ekkert fé hafi verið borgað fyrir gíslana.

"Við munum nota peningana til að kaupa vopn, endurnýja fjarskiptanet okkar og kaup fleiri ökutæki til sjálfsmorðsárása," segir Talibaninn við Reuter. Sem fyrr segir neitar talsmaður stjórnar Suður-Kóreu þessu en stjórnvöld þar hafa verið gagnrýnd fyrir að semja við Talibana. Slíkt auki aðeins hættuna á fleiri mannránum.

Qari Yousef Ahmadi talsmaður Talibana lýsti því yfir í samtali við AP í gærdag að fleiri mannrán væru á döfinni. "Við munum gera hið sama við aðra því við sjáum að þetta skilar okkur árangri," segir Ahmadi.