Stefnt í lífshættu af sambýlismönnum

Þrjár konur, sem leitað hafa til Áfallamiðstöðvar Landspítalans í Fossvogi, eru í stöðugri lífshættu vegna kúgunar sambýlismanns. Þetta segir dr. Berglind Guðmundsdóttir, sálfræðingur á Áfallamiðstöðinni.

„Þær hafa leitað til okkar og árásirnar, ógnirnar og áverkarnir, þetta hefur allt verið mjög alvarlegt. Þetta er endurtekið ofbeldi sem er enn í gangi. Ofbeldismaðurinn er stöðugt að ógna og maður veit aldrei hvenær lífshættuleg árás getur átt sér stað,“ segir Berglind.

Fjöldi kvenna leitar aðstoðar Áfallamiðstöðvar vegna ofbeldis. „Konur koma annaðhvort til okkar beint út af ofbeldinu, eða leita til okkar vegna áverka sem grunur leikur á að séu vegna heimilisofbeldis,“ segir Berglind.

„Oft koma konurnar inn með ofbeldismanninum,“ segir Berglind. „Hann kemur og stendur vörð um þær, til að tryggja að þær segi ekki frá. Starfsfólk þarf að geta greint vandann þegar konur koma ítrekað inn með óskilgreinda áverka.“

Berglind segir að konurnar þori oft ekki að segja frá ofbeldinu og stundum sé nauðsynlegt að spyrja þær beint um það. „Þær óttast mennina svo mikið að þær eru hræddar við að kæra og fara lagalegu hliðina. Þær óttast jafnvel að fara úr ofbeldissambandinu, en rannsóknir sýna að ofbeldi versnar oft við að þær fara úr sambandinu,“ segir Berglind.

Oft hafa lögreglan og stuðningssamtök engin ráð til að stöðva ofbeldismenn, að sögn Berglindar. „Stundum hverfa konurnar frá okkur og afþakka þjónustu. Þá vitum við ekki hvað verður um þær. Ef ofbeldismaðurinn er á einhvern hátt í lífi konunnar stoppar ofbeldið ekki nema hann leiti sér hjálpar.“

Í kynferðisafbrotamálum fær þolandinn lögfræði- og sálfræðiþjónustu og eftirfylgd ef hann vill. Berglind segir stefnt að því að setja heimilisofbeldismálin í sama farveg, en til þess vanti peninga. „Við bindum vonir við að það fáist fjármagn til að byggja þessa þjónustu upp enn frekar og Jóhanna Sigurðardóttir félagsmálaráðherra hefur sagst ætla að setja málaflokkinn í forgang,“ segir Berglind.