Dýrustu íbúðarvillurnar í Danmörku selja sig næstum sjálfar. Fréttavefur Jyllands Posten greinir frá því að íbúðarhús sem seld eru á nærri þrjú hundruð milljónir íslenskra króna í Danmörku renni út á meðan mun hægar gangi að selja helmingi ódýrari eignir.
Fasteignamarkaðurinn í Danmörku hefur staðið nokkuð í stað undanfarið og verð almennt tekið að lækka. Það á þó ekki við um dýrustu eignirnar þar sem salan blómstrar sem aldrei fyrr. Fasteignasalar segja svo mikla eftirspurn eftir dýrum eignum í Danmörku að auðvelt sé að selja þær á uppsprengdu verði. Fasteignasali sem blaðið ræddi við var himinlifandi með ástandið enda fær hann tvö komma fimm prósent í sölulaun sem gera sjö og hálfa milljón króna ef hann selur þrjú hundruð milljón króna eign.
