Bílnúmerið hjá Eika Hauks var notað í leyfisleysi

„Ég vissi varla hvaðan á mig stóð veðrið," segir Kristinn Gísli Guðmundsson. En á mánudagskvöldinu fékk hann símhringingu frá góðum félögum sem vinsamlegast bentu honum á að horfa á myndbandið við framlag Íslendinga í Eurovision, Valentines Lost.

Þar sést hárbróðir Kristins, Eiríkur Hauksson, rúnta um í Hvalfirðinum ásamt hljómsveit í glæsibifreið með bílnúmerið „Big Red". Númer sem Kristinn er þekktur fyrir að hafa haft á sínum bíl í nokkur ár og vakið verðskuldaða athygli fyrir.

„Ég skilaði númerinu inn fyrir tveimur árum en á réttinn til ársins 2012," segir Kristinn. „Og þarna var þessu númeri mínu hreinlega rænt," bætir hann við og skellihlær, tekur þessum meinta þjófnaði augljóslega af mikilli léttúð. „Samt finnst mér að þeir ættu nú bara að bjóða mér til Finnlands í staðinn," segir Kristinn í gríni.

Reyndar hefur annar Íslendingur hefur borið þetta viðurnefni Big Read og hlotið mikla frægð fyrir en Kristinn segir að Steingrímur Hermannsson, fyrrum forsætisráðherra, hafi verið kallaður þessu nafni þegar hann glímdi í Bandaríkjunum á yngri árum.

Gunnari Birni Guðmundssyni, leikstjóra myndbandsins, brá heldur betur í brún þegar Fréttablaðið hermdi þennan óheppilega stuld upp á hann. Honum þótti þetta miður, að hafa ekki kynnt sér þetta betur og enn verra fannst honum að hafa rænt númeri frá sveitunga sínum úr Hafnafirði. „Hefði ég bara vitað þetta," segir Gunnar. „Þá hefði ég aldrei gert þetta," útskýrir leikstjórinn.

„Þetta eru augljóslega listræn mistök," bætir hann við. Gunnar segir að þeir hafi haft úr tuttugu númerum að velja og honum hafi strax fundist Big Red henta ákaflega vel enda hefur mikið verið gert úr háralit Eiríks.

„Það verður að viðurkennast að þetta var klaufalegt af okkur, að kynna okkur ekki númerin betur," bætir Gunnar við. „Ég verð að reyna koma þeim tveim saman og láta Eirík afhenda honum þetta númer. Kannski bara þegar Eiríkur er búinn að vinna keppnina úti," segir Gunnar sem hefur tröllatrú á söngvaranum í keppninni. „En Kristinn má vera stoltur. Númerið hans á eftir að birtast í myndbandi sem verður spilað útum alla Evrópu."