Frábær endurkoma hjá Reading

Nú er kominn hálfleikur í leikjunum fimm sem standa yfir í ensku úrvalsdeildinni í knattspyrnu. Mesta fjörið er án efa á leik Reading og Middlesbrough á Majeski vellinum í Reading, þar sem heimamenn skoruðu tvö mörk undir lok hálfleiksins og jöfnuðu eftir að hafa lent undir 2-0.

Stewart Downing og Yakubu komu Middlesbrough í 2-0 eftir aðeins 22 mínútur og útlit fyrir langan dag hjá heimamönnum í Reading. Þeir Dave Kitson og Steve Sidwell jöfnuðu fyrir Reading á síðustu mínútum fyrri hálfleiksins og síðara markið kom eftir frábæran undirbúning Ívars Ingimarssonar.

Charlton hefur yfir 1-0 á útivelli gegn West Ham með marki Darren Bent, Portsmouth hefur yfir gegn Blackburn með marki Todorov, Newcastle leiðir 1-0 gegn Wigan með marki Scott Parker, Andy Johnson skoraði sitt fyrsta mark fyrir Everton og kom liðinu í 1-0 gegn Watford og ekkert mark hefur verið skorað á Emirates vellinum þar sem Arsenal tekur á móti Aston Villa.