Fréttirnar af Rooney eru kjaftæði

Sir Alex Ferguson, stjóri Manchester United, segir að fréttir af himinháum spilaskuldum ungstirnisins Wayne Rooney séu rakalaus þvættingur en séu því miður fylgifiskur þess að vera stórstjarna í knattspyrnu og líkir því sem Rooney gengur í gegn um nú við það sem menn á borð við George Best, Paul Gascoigne og David Beckham þurftu að þola á sínum ferli.

"Þessar fréttir eru kjaftæði, en þetta fylgir því að vera stjórstjarna og þeir Best, Gascoigne og Beckham þurftu allir að berjast við svona lagað. Ég þekki Rooney vel og við munum gera allt sem við getum til að afsanna þetta rugl sem haldið er fram í blöðunum," sagði Ferguson, en því var haldið fram í gær að Rooney skuldaði hátt í eina milljón punda vegna veðmála.