Japanar fara frá Írak

Japönsku herstöðinni í Írak verður lokað í dag. Enginn japanskur hermaður hefur fallið í átökum í landinu en þeir eru um sex hundruð talsins.

Þar með er umsvifamesta verkefni japanska hersins utan heimalandsins frá lokum síðari heimsstyrjaldar lokið. Um sex hundruð japanskir hermenn eru nú í Írak. Koizumi, forsætisráðherra Japans, tilkynnti síðastliðinn þriðjudaginn að hermennirnir yrðu sendir heim en búist er við að brottflutningnum frá Írak ljúki fyrir lok næsta mánaðar. Stuðningur við aðild Japana heima fyrir hefur minnkað að undanförnu. Ótrúlegt þykir að engir japanskir hermenn hafi fallið eða særst í átökum í Írak en yfir 2500 bandarískir og breskir hermenn hafa fallið síðan innrás var gerð árið 2003. Flutningabílar hófu í dag að flytja hergögn burt frá japönsku herstöðinni í suðurhluta landsins en búist er við að það taki að nokkrar vikur að ganga frá öllu áður en hermennirnir verða sendir heim. Japanska herstöðin var sett upp í Írak árið 2004.