Líklega myrtar í bíl

Breska lögreglan hefur upplýst að lík vændiskvennanna fimm, sem þegar hafa fundist, hafi öll verið nakin, að frátöldum skartgripum þeirra. Talið er líklegast að þær hafi verið kæfðar eða kyrktar. Greinileg merki um kyrkingu fundust á hálsi að minnsta kosti einnar stúlku.

Lögreglumenn og sálfræðingar velta því fyrir sér hvort eitthvað megi lesa út úr þessu. Lögreglan er viss um að konurnar voru ekki myrtar á þeim stöðum sem þær fundust á, heldur fluttar þangað að ódæðinu loknu.

Morðstaðir hafa engir fundist, sem er kannski ekki skrýtið þar sem talið er líklegt að þær hafi verið myrtar í bíl. Lögreglan leitar að bláum BMW sem ein kvennanna sást fara upp í, skömmu áður en lík hennar fannst. Ökumaðurinn er sagður hafa verið feitlaginn, dökkhærður, með gleraugu.