Landamærin lokuð við Rafah

Rafah-landamærin milli Palestínu og Egyptalands eru nú lokuð í þrjár vikur og Palestínumönnum þar með meinað að heimsækja vini og ættingja í Egyptalandi. Óbreyttir borgarar tóku þar lögin í eigin hendur og réðust í gegnum hliðin en voru síðan stöðvaðir af lögreglumönnum sem gættu landamærastöðvarinnar.

Á Gaza-svæðinu er fólk nú farið að hamstra mat og aðrar birgðir af ótta við stöðugt versnandi lífsskilyrði í þessu strandhéraði. Mannréttindasamtök í Palestínu kvarta nú yfir því að sprengjuárásir Ísraela undanfarið hafi eyðilagt það sem hafði náðst að byggja upp undanfarinn áratug.

Ísraelar gerðu nú rétt áðan sprengjuárás á palestínska ráðuneytisbyggingu þar sem þeir segja Hamas-flokkinn sem er í ríkisstjórn bera beina ábyrgð á hvarfi ísraelsks hermanns sem Palestínumenn hafa í haldi.