Mótmælum flaggað á Sigurboganum

Sigurboginn í París varð óvænt vettvangur mótmæla gegn Íransstjórn í dag þegar andstæðingar kjarnorkuáætlana Íransstjórnar flögguðu skilaboðum sínum uppi á boganum.

Skilaboðin á fána mannanna tveggja voru þau að Rússland og Kína skyldu varast að styðja við bakið á Íransstjórn. Mennirnir tilheyra hreyfingu sem styður endurupptöku konungdæmis í Íran.

Slökkviliðsmenn og lögreglumenn söfnuðust fljótt á staðinn, sem og túristar sem fengu óvænt eftirminnilegar myndir frá heimsókn sinni á einn af helstu ferðamannastöðum í París. Enginn slasaðist þó og mennirnir voru fljótlega hífðir upp á rúmlega fimmtíu metra hátt minnismerkið.

Vesturlönd hafa þrýst á um breiða samstöðu um að þvinga Íran til að hætta auðgun úrans en ýmis óháð lönd hafa sagt að Íran, eins og öll önnur lönd, eigi rétt á því að nýta kjarnorku í friðsamlegum tilgangi til raforkuframleiðslu. Sérstaklega kemur það sér illa fyrir Vesturveldin að Rússland og Kína neiti að styðja áætlunina gegn Íran, þar sem þessi lönd hafa neitunarvald í öryggisráðinu.