Þriðjudagur, þrír dagar í HM

Hver er stærsta frétt vikunnar? Á mælikvarða stjórnmálanna hér í túninu heima er það sjálfsagt afsögn Halldórs Ásgrímssonar, á heimsmælikvarða er ein stærsta fréttin hinsvegar að HM byrjar á föstudaginn, eftir slétta þrjá daga.

Ég talaði við Júlíu Sigursteinsdóttur í Munchen síðdegis í dag, allt að gerast í borginni, búið að setja upp risasjónvörp, sjónvörp af miðlungsstærð og lítil sjónvörp um alla borg, draga allar bjórdælur sem virka á flot og heimamenn geta ekki beðið eftir því að byrja að verja heiður sinn í opnunarleiknum á móti Costa Ríka.

Þeir eiga ekki einu sinni hér, frekar en við Íslendingar og kannski lítil hefð fyrir því að eiga í stríði á erlendri grundu, ef nota má það orð um viðureignina við blessaða sameinaða Þjóðverjana. Ballack og co komu til Berlínar í dag og honum var tekið einsog Jesú Kristi í jakkafötum.

Svo er það stríðið útaf vændiskonununum, hvað á FIFA að gera annað en Sambandið hefur þegar gert, lýsa yfir fordæmingu og vandlætingu á því að óprúttnir aðilar skuli flytja allt að 70.000 gleðikonur til Þýskalands til að skemmta gestum og gangandi. Varla er hægt að handtaka allar ungar konur með varalit og augnskugga sem koma yfir landamærin. Þessi málatilbúnaður samtaka útum allan heim er hinsvegar frábær, hann vekur athygli á því skelfilega hlutskipti sem margar konur búa við, því hugmyndafræðin um hamingjusömu hóruna er bara til í skáldskap eftir Paolo Coelo.

Að því sögðu, er fótboltinn það sem mestu máli skiptir í þessari viku, og ef okkur auðnaðist að fá vitringana þrjá til að koma til Munchen á föstudaginn með gjafir, myndi ég biðja þá í leiðinni að segja mér hvaða heillastjarna er yfir hvaða liði í keppninni. Ég flýg til hinnar helgu fótboltaborgar Munchen síðdegis í dag og byrja að afla frétta og senda heim, ef það verður þá eitthvert rúm í fjárhúsinu fyrir annað en fréttir af Framsóknarflokknum og niðurlægingu hans.