Andriy Shevchenko fer frá Milan

AC Milan mun hefja viðræður við Chelsea eftir að Andriy Shevchenko staðfesti að hann myndi fara frá Milan. Shevchenko hitti forseta Milan, Adriano Galliani, í dag til þess að ræða framtíð sína. Eftir fundinn sagði Shevchenko, "Ég er að fara vegna fjölskylduaðstæðna, þetta er ekki vegna neinna annarra vandamála og ekki vegna peningamála."

Galliani sagði, "Þetta er einhver erfiðasti skilnaður sem ég hef þurft að glíma við eftir að ég kom hingað til Milan. Við munum hefja viðræður við Chelsea og það mun verða erfitt."

Shevchenko á bandaríska eiginkonu og er því haldið fram að þau vilji að sonur þeirra Jordan læri ensku.

Galliani sagði, "Þetta er sigur enskunnar á ítölskunni. Ég hef reynt að sannfæra hann um að vera áfram, jafnvel einni mínútu fyrir fréttamannafundinn."

Milan bauð Shevchenko framlengingu á samningi hans til ársins 2011.

"Ósk mín er sú að Milan leyfi mér að fara, auðvitað er ég sorgmæddur. Ég hef séð andlit stuðningsmanna Milan og vegna allra skeytanna sem ég hef fengið," sagði Shevchenko.

Eiginkona leikmannsins Kristen Pazak, er talin vera vinur eiganda Chelsea Roman Abramovich.

"Kona mín hafði ekkert með þetta að gera. Við tókum þessa ákvörðun saman og höfðum að leiðarljósi framtíð fjölskyldunnar. Ég tala ekki ensku og kona mín talar ekki úkraínsku, eina sameiginlega tungumál okkar í augnablikinu er ítalska. Eini möguleikinn fyrir okkur að kenna börnum okkar hvað við elskum þau mikið er að við lærum ensku," sagði Shevchenko.

Shevchenko kom til Milan frá Dynamo Kiev árið 1999 og er hann næst hæsti markaskorari Milan á eftir Gunnari Nordahl sem skoraði 173 mörk.

Hann skoraði 19 mörk í 28 leikjum í Seríu-A á síðasta tímabili og skoraði einnig 9 mörk í Meistaradeildinni.

Shevchenko mun verða fyrirliði Úkraínu á HM í Þýskalandi í næsta mánuði.