Ástralía

Ástralir eru í F riðli með Brasilíumönnum, Japönum og Króötum. Þeir eru í 42. sæti á styrkleikalista FIFA . Það gæti orðið barátta um annað sætið í riðlinum ef við gefum okkur að heimsmeistararnir vinni hann.

Ástralir slógu loks út Úrúgvæa í umspili og það í vítaspyrnukeppni. Þeir eru með leikmenn sem leika út um allt meginland Evrópu og á Englandi. Með einn best þjálfara heims vonast þeir til að ná árangri á mótinu.

Gus Hiddink tók við vonlausu verkefni af Frank Farina í júlí. Nú er hann mættur með enn eitt liðið á lokakeppni HM en hann hefur stýrt liðum sínum í undanúrslit í tveimur síðustu keppnum, fyrst Hollandi árið 1998 og svo Suður Kóreu árið 2002. Rússar hafa nælt í þennan snilling því þeirra tilraun til að komast á HM fór út um þúfur.

Mark Schwarzer markvörður Middlesbrough og Tim Cahill miðjumaður Everton voru báðir kallaðir til Þrátt fyrir að eiga við meiðsli að stríða. "Liðið er klárt í mótið, tilbúið til að koma á óvart og upp úr riðlinum," sagði Hiddink þegar hann valdi liðið.

Tim Cahill er framsækinn miðjumaður sem getur skorað mörk og ef hann nær sér í tæka tíð á hann eftir að vera mikilvægur fyrir Ástrala. Einnig má nefna Kewell sem virðist vera að ná sínu fyrra formi eftir nokkur erfið ár.

Fyrirliði: Mark Viduka

Lykilmaður: Tim Cahill

Gæti slegið í gegn: Tim Cahill