Romario unnusti Sylvíu Nóttar með matareitrun

Romario, unnusti Sylvíu Nóttar og annar tveggja sem eiga að dansa með Sylvíu Nótt á sviðinu í OAKA höllinni í Aþenu í kvöld er með matareitrun og var gefin næring í æð. Romario hefur ekki haldið neinu niðri og var því gefin næring í æð baksviðs í OAKA höllinni þar sem forkeppni Eurovision fer fram í kvöld en óttast var að hann gæti ofþornað. Romario ætlar þó að stíga á svið með Sylvíu Nótt í kvöld.

Íslendingarnir stíga á svið OAKA hallarinnar eftir rúmar tvær klukkustundir og flytja framlag Íslands, "Til hamingju Ísland" eða "Congratulations" í forkeppni Eurovision.

Sylvía Nótt var sigurviss eftir æfingu í gær og sagði þá meðal annars við blaðamann Fréttablaðsins “Æfingin var æðisleg. Hvað sem ég geri er æðislegt. Ég gæti skitið á sviðið og samt unnið keppnina.”

Allir vita hverjar afleiðingar matareitrun getur haft og því spurning hvort Sylvía Nótt hafi séð fyrir veikindi Romarios þegar þessi yfirlýsing var gefin í gær.