Fundu urmul áður óþekktra dýrategunda

Á tímum þegar fréttir af útrýmingu dýrategunda og umhverfisvár af ýmsu tagi eru áberandi eru tíðindi af hverri nýrri tegund sem uppgötvast sérstakt fagnaðarefni. Að þessu sinni virðist hópur vísindamanna frá Ástralíu, Bandaríkjunum og Indónesíu hafa svo sannarlega komist í feitt á indónesíska hluta Nýju Gíneu Papúa, svæði sem þeir líktu við aldingarðinn Eden.

"Það sem við fundum í Foja-fjöllunum var ekki aðeins urmull af nýjum tegundum, sem eru sumar hverjar stórar og mikilfenglegar, svo sem fyrsta fuglategundin sem uppgötvast í 70 ár, heldur margar aðrar tegundir sem hafa horfið frá öðrum stöðum í Nýju-Gíneu en er ennþá að finna þarna," sagði Stephen Richards, vísindamaður við South Australian Museum.

Á meðal þess sem vísindamennirnir fundu voru froskar af þrjátíu mismunandi tegundum, svonefndur Berlpepsch-paradísarfugl, sem fyrir löngu var talinn útdauður, afar sjaldgæfir mjónefir, sem eru spendýr sem verpa eggjum, og síðast en ekki síst gulltrjákengúra sem aldrei hefur fundist áður í Indónesíu.

Svæðið sem dýrin og jurtirnar fundust á er djúpt inni í frumskóginum og afar afskekkt en fjölda leyfa frá ríkisstjórn Indónesíu þurfti til að komast þangað. Því virtist svæðið vera með öllu ósnortið enda undruðust vísindamennirnir mjög að dýrin hefðu verið algerlega óttalaus í kringum.

"Ég held að eitt það merkilegasta sem hefur komið út úr þessari ferð er að hún hefur sýnt fram á að vegna þess hversu lítil áhrif menn hafa haft á þessum slóðum eru þær næstum eins og Nýja-Gínea var fyrir 50 þúsund árum," segir Richards.

Einhver bið verður hins vegar á að dýrin og jurtirnar verði tekin inn í fánu og flóru heimsins því fyrst verða kollegar vísindamannanna að leggja blessun sína yfir niðurstöður rannsókna þeirra.

Papúa Nýja-Gínea er næst stærsta eyja í heimi. Bróðurpartur hennar er þakinn regnskógi og því er hún svo erfið yfirferðar að dýrin hafa fengið að lifa þar alla tíð óáreitt.