Skattbyrði jókst hvergi meira í iðnríkjum heims en á Íslandi

19. janúar 2006 19:54

Skattbyrði jókst hvergi meira í iðnríkjum heims en á Íslandi á árunum 1995 til 2004. Þetta sýna skattaskýrslur OECD. Ísland er nú komið í hóp þeirra tíu ríkja þar sem skattbyrði er þyngst. Núverandi stjórnarflokkar settust að völdum árið 1995 og hafa síðan verið iðnir við að halda því fram að þeir væru að lækka skatta. Efnahags- og framfarastofnunin, OECD, mælir skattheimtu meðal iðnríkja heims í hlutfalli af landsframleiðslu, og fær þannig út skattbyrðina, en með henni sést hve mikið hið opinbera, bæði ríki og sveitarfélög, tekur til sín af öllum þeim tekjum sem myndast í samfélaginu.

þegar rýnt er í árlega skattaskýrsla OECD, sem birtist í vetrarbyrjun, sést að mestu skattahækkanir á árabilinu 1995 til 2004 voru á Íslandi, en nýjustu tölur frá 2004 eru bráðabirgðatölur. Skattbyrðin jókst hérlendis úr 32,1 prósenti upp í 41,9, prósent eða um 9,8 prósentustig. Næst kom Tyrkland en þar þyngdist skattbyrðin um 8,5 prósentstig. Í Kóreu þyngdist hún um 5,2, í Noregi um 3,8 en síðan koma Spánn, Svíþjóð, Mexíkó, Austurríki, Sviss og Bretland. Athygli vekur hvað Ísland og Tyrkland skera sig úr þegar tölur OECD eru bornar saman um mestu skattahækkanir meðal iðnríkja heims. Þynging skattbyrði hérlendis var þannig tífalt meiri en í Bretlandi sem var í tíunda sæti.

Fullyrðingar íslenskra stjórnmálamanna um skattalækkanir stangast á við skattaskýrslur OECD sem sýna Ísland ekki meðal ríkja sem þar sem skattbyrði hefur lækkað. Hún lækkaði mest í Ungverjalandi á þessu árabili, um 4,7 prósentustig, en aðrar ríkisstjórnir sem geta flaggað skattalækkunum með tilvísun í OECD eru í Kanada, Hollandi, Þýskalandi, á Írlandi, í Bandaríkjunum, Finnlandi, Lúxemborg og á Nýja-Sjálandi. Því hefur löngum verið flaggað að skattbyrði sé lág á Íslandi. Það hefur breyst hratt og er Ísland nú komið á topp tíu listann yfir þyngstu skattbyrðina innan OECD.

Svíþjóð er á toppnum en þar tekur hið opinbera í skatta meira en helming landsframleiðslunnar. Danmörk eru litlu neðar með rétt tæplega 50 prósent en síðan koma Belgía, Noregur, Finnland, Frakkland, Austurríki, Ítalía, og Ísland, sem er í níunda sæti, en Lúxemborg er svo tíunda landið á lista þeirra ríkja sem þyngstar byrðar leggja á skattþegna sína.

Mest lesið

Fleiri fréttir