Undirskriftalistar til að mótmæla ritstjórn DV

11. janúar 2006 20:00

Mál málanna í dag hefur verið umfjöllun DV um grunaðan kynferðisbrotamann, sem svipti sig lífi eftir að blaðið hafði samband við hann. Lögreglan á Ísafirði hefur ekki ákveðið hvort rannsókn á meintu kynferðislegu ofbeldi hans gegn tveimur unglingspiltum verði haldið áfram, þótt hann sé látinn. Lögmenn segja rannsókninni þó sjálfhætt samkvæmt íslenskum réttarreglum.

Lögmenn sem fréttastofa ræddi við í dag sögðu að rannsókn málsins væri sjálfhætt samkvæmt íslenskum réttarreglum þar sem maðurinn væri fallinn frá. Lögreglan á Ísafirði sagði hinsvegar að engin ákvörðun lægi fyrir.

Í bréfi sem hinn látni skildi eftir sagðist hann ekki hafa treysta sér til að standa undir þeirri fjölmiðlaumfjöllunsem framundan væri.

Mikael Torfason ritstjóri telur NFS hafa sýnt vanstillingu í málinu og ætlar þess vegna ekki að tjá sig við fréttastofuna. Jónas Kristjánsson vændi fréttamenn NFS um sósíalfasisma í viðtali við Ríkisútvarpið. Hann býst ekki við að nein breyting verði á ritstjórnarstefnu blaðsins. Blaðamenn og ritstjórnar blaðsins gagnrýndu að teknar hefðu verið myndir í heimildarleysi inni á blaðinu og verða þær því ekki sýndar óruglaðar.

Stjórn Blaðamannafélagsins segir að félagið harmi þann atburð sem leitt hafi til umræðu um vinnubrögð og ritstjórnarstefnu DV. Ritstjóri DV hafi lýst því yfir að blaðið fari eftir eigin siðareglum þótt þær stangist á við siðareglur Blaðamannafélagsins. Þetta sé ótækt og hverjum blaðamanni sé skylt að starfa eftir siðareglum félagsins. Arna Schram segir að fyrir dyrum sé endurskoðun á siðareglunum til að freista þess að ná fram sátt um þær. Það hafi verið ákveðið í fyrra. Ef það takist ekki gæti farið svo að einhver hluti félagsins teldi sig ekki eiga heima innan félagsins.

Stjórnmálamenn, fjölmiðlamenn og fjöldi annarra einstaklinga hafa gagnrýnt ritstjórnarstefnu blaðsins harðlega í dag. Lengst gengur Hjálmar Árnason þingflokksformaður Framsóknarflokksins sem segist taka undir með þeim sem fullyrði að blaðið hafi drepið mann. Össur Skarphéðinsson þingmaður Samfylkingar spyr sig hvort Jónas Kristjánsson ritstjóri blaðsins muni skrifa nýjan leiðara um hvernig sé að leika guð og vega menn á skálum sannleikans og Björn Bjarnason dómsmálaráðherra spyr hversu lengi eigendur blaðsins ætli að láta það veitast að varnarlausu fólki á sinn kostnað. Þá hafa formenn allra þingflokka á Alþingi tekið undir ályktanir ungliðahreyfinga stjórnmálaflokka og biðja ritstjórn DV um að endurskoða ritstjórnarstefnu sína.

Deiglan.com heldur úti undirskriftasöfnun á netinu þar sem mótmælt er ritstjórnarstefnu DV sem er sögð óábyrg og skeytingarlaus í umfjöllun um menn og málefni. Ungliðasamtök stjórnmálaflokka, námsmanna og Stúdentaráð Háskóla Íslands höfðu vefsíður sínar lokaðar milli tvö og fjögur í mótmælaskyni við blaðið í dag.

Alls höfðu 15.057 skrifað sig á listann.

Fréttir Innlent

Mest lesið

Fleiri fréttir