Starfsmaður FIFA sagður útvega leikmönnum kvenfólk

Starfsmaður FIFA, alþjóðaknattspyrnusambandsins, sem jafnframt er aðstoðarmaður og túlkur landsliðs Paragvæ á HM í knattspyrnu sætir nú ámæli fyrir tilraunir til að koma á kynnum milli leikmanns liðsins og sænsks blaðaljósmyndara.

Ljósmyndarinn, Emelie Aspelund og blaðamaðurinn Maria Nordström, sem báðar starfa fyrir Dagens Nyheter, höfðu verið sendar til Árósa í Danmörku til að fylgjast með landsliði Paragvæ. Þar lék liðið æfingaleik gegn danska landsliðinu á laugardag. Að leik loknum ræddu blaðamenn og ljósmyndari við leikmenn og þjálfara Paragvæ og nutu aðstoðar Manuel Hoffman, starfsmanns FIFA en sá er aðstoðarmaður Paragvæ og túlkaði samskiptin.

Starfsmenn Dagens Nyheter og landsliðshópur Paragvæ bjuggu á sama hóteli og segir Emelie Aspelund að skömmu eftir að hún var lögst til svefns hafi síminn hringt á hótelherbergi sínu.

"Þetta var klukkan eitt að nóttu. Manuel Hoffman, starfsmaður FIFA var í símanum og sagði að einn leikmanna landsliðs Paragvæ vildi hitta mig þá þegar um nóttina til að kynnast mér betur," segir Aspelund.

Aspelund segist hafa gert athugasemdir vegna þessa við Hoffman morguninn eftir og sagt slík samskipti óviðeigandi. Hoffman svaraði um hæl að það væri erfitt að draga línur í starfi sem þessu, hversu langt ætti að ganga.

Í Dagens Nyheter er haft eftir Hoffman að hann sjái ekkert athugavert við símtalið. Það sé í hans verkahring að aðstoða leikmenn. Þegar hann er spurður hvort það sé líka í verkahring starfsmanna FIFA að útvega leikmönnum liðanna á HM kvenfólk á hótelherbergi um miðjar nætur, svarar Hoffman; "ég get ekki tjáð mig um innihald einstakra símtala."