Hroki verður þér að falli

Páll Óskar Hjálmtýsson verður með sitt árlega Eurovision-partí á skemmtistaðnum Nasa í kvöld.

Á meðal þeirra sem koma fram eru Selma Björns, Stebbi og Eyfi og Icy auk þess sem Eiríkur Hauksson syngur Lífið er lag. Páll Óskar verður jafnframt plötusnúður kvöldsins.

Páll er að vonum hundsvekktur með það að Silvía Nótt skyldi ekki komast áfram í úrslit Eurovision en tekur engu að síður ofan fyrir Ágústu Evu Erlendsdóttur fyrir að hafa haldið út atriðið miðað við viðtökurnar sem hún fékk.

"Aldrei áður í níutíu ára sögu Eurovision hefur verið baulað svona hressilega á þátttakandann áður en lagið byrjar," segir Páll Óskar.

"Einu sinni áður hefur verið baulað á keppanda eftir að lagið var búið. Það var 1984 þegar það var baulað á bresku stúlknasveitina Bell and the Devotions með lagið Love Games. Einfaldlega vegna þess að það voru þrjár mjóar og sætar stelpur á sviðinu að "mæma" lag sem þrjár feitar, góðar söngkonur voru að syngja á bak við þær. Það var svo auðséð að þær voru að syngja í þykjustunni að það var baulað hressilega en þrátt fyrir það endaði Bretland í sjöunda sæti," segir Páll.

Bætir hann því við að sífellt fleiri vilji skipta Eurovision-keppninni í tvennt þar sem Austur- og Vestur-Evrópa haldi sína hvora undankeppnina og keppi síðan innbyrðis í glæsilegri lokakeppni.

"Við megum ekki gleyma okkar þætti sem var sá að við kusum Silvíu Nótt. Okkur fannst hún æðisleg en það tók Íslendinga hálft ár að fatta þennan brandara. Hvernig í ósköpunum getum við ætlast til þess að öll Evrópa nái þessum brandara á þremur mínútum? 97 prósent þeirra Evrópubúa sem voru að horfa á þessa keppni hafa ekkert fylgst með neinni fjölmiðlaumfjöllun og þeir koma algerlega grænir að sjónvarpstækjunum," segir hann.

Frábær ádeila"Þetta sem við höfum fengið að vera vitni að undanfarnar vikur í kringum Silvíu Nótt er eitt það almesta listaverk sem ég hef orðið vitni að í háa herrans tíð. Þetta var einn alflottasti gjörningur og besta pönk sem við höfum fengið í mörg, mörg ár. Ef Ágústa Eva getur höndlað dramatík eins vel í Mýrinni og hún höndlar kómík er stórleikkona hér á ferð. Þegar upp er staðið gerir maður sér grein fyrir því að Silvía Nótt er frábær ádeila á fólk sem er frægt fyrir að vera frægt. Þetta er fólk sem arkar um fullvisst um eigið ágæti með frekju og dónaskap. Eru ekki skilaboðin dálítið skýr frá þessu leikriti sem við erum búin að vera að fylgjast með alla vikuna, að hroki verður þér að falli? Það er kannski puntkurinn með leikritinu hennar Silvíu," segir hann.

Grikkir eða Svíar vinnaPáll saknar Belgíu í úrslitunum er er annars ánægður með þær þjóðir sem komust áfram fyrir utan Armeníu. Hann spáir að annað hvort Grikkland eða Svíþjóð beri sigur úr býtum en á líka von á að Finnar fari langt. Í uppáhaldi hjá honum er aftur á móti framlag Rúmeníu.

Eurovision-partíið hjá Palla hefst klukkan 23.30 í kvöld og stendur yfir til 5.30. Miðaverð er 1.900 krónur.