Fyljgast vel með olnbogum leikmanna

Forseti FIFA, Sepp Blatter hefur beðið þá dómara sem að dæma á HM, að gæta sérstaklega vel að því að leikmenn séu ekki að reka olnbogann í andstæðinginn og brjóta jafnvel tennur í mönnum.

Öllum dómurunum hefur verið sagt að sýna leikmönnum rauða spjaldið ef að þeir nota hendur og olnboga viljandi.

Blatter sagði að hann hefði miklar áhyggjur af því hvað menn væru farnir að nota þetta bragð oft í fótbolta nú orðið.

"Það hefur verið tekið skýrt fram við dómara að þeir eigi að fylgjast sérstaklega vel með höndum leikmanna og að passa það vel að stjörnur mótsins verði ekki fyrir fólskubrögðum. Það er ekki langt síðan að leikmaður missti tvær tennur í Evrópuleik, vegna þess að hann fékk olnboga í andlitið á sér. Þjálfurum landsliða hefur verið gert grein fyrir því að hart verði tekið á þessu, og að bókað verði fyrir svona uppátæki" sagði Blatter.

Blatter segir að FIFA treysti dómurum keppninnar til þess að taka réttar ákvarðanir, "auðvitað verða alltaf atvik þar sem að menn eru ekki sáttir og sammála, en dómarar eru mannlegir, þeir skilgreina lög knattspyrnunnar ekki allir eins en við treystum þessum mönnum fullkomlega" sagði Blatter.

Horacio Elizondo, verður fyrst dómarinn til þess að fylgja þessari reglu en hann dæmir fyrsta leikinn á HM, leik Þjóðverja og Costa Rica.