Kerry biðst afsökunar

John Kerry, öldungardeildarþingmaður demókrata í Massachusetts, lét í kvöld undan þrýstingi og bað hermenn í Írak afsökunar, sem og fjölskyldur þeirra og nákomna. Hann sagðist harma það að orð sín hefðu verið mistúlkuð, hann hefði ekki viljað særa neinn. Repúblikanar hafa gert sér mat úr orðum hans og er talið að þetta gæti jafnvel haft áhrif á kosningaúrslit.

Kerry las í kvöld upp yfirlýsingu þar sem sagði meðal annars: "ég harma það að orð mín hafi verið mistúlkuð þannig að þau tjái neikvæðni í garð einkennisklæddra hermanna og ég biðst persónulega afsökunar við hvern hermann, fjölskyldumeðlim eða annan Bandaríkjamann sem móðgaðist."

Orð Kerrys sem vöktu svo mikla reiði voru á þann veg að stúdentar ættu að leggja hart að sér við námið, ellegar ættu þeir á hættu að enda í Írak. Repúblikanar sögðu þessi orð niðrandi athugasemd um gáfnafar hermanna í Írak.