Bæjarstjórinn boðinn velkominn í Ástarvikunni

Ástarvikan í Bolungarvík verður sett á sunnudaginn en þetta er í þriðja sinn sem þessi hátíð er haldin. Að sögn Soffíu Vagnsdóttur, eins af frumkvöðlum þessarar sjóðheitu viku, var hún upphaflega hugsað sem innanbæjargrín og átti að vera hvetjandi fyrir íbúa bæjarins til að fjölga mannkyninu.

"Fyrsta árið kom eitt barn í heiminn í maí, níu mánuðum eftir að vikunni lauk, en í fyrra kom ekkert," segir Soffía. "Íbúarnir eru hins vegar búnir að kaupa mikið af rauðum seríum í ár," bætir hún við og bendir því allt til þess að Bolvíkingar ætli að taka Ástarvikuna með trompi þetta árið.

Ástarvikan hefst með því að íbúar Bolungarvíkur senda ástarkveðjur til heimsins með blöðrum en svo verður skellt upp stórdansleik með fönkhljómsveitinni Jagúar. Síðan verður dagskrá út alla vikuna og meðal þess er námskeið hjá Dísu í listasmiðjunni en hún ætlar að kenna fólki að búa til muni sem geta lífgað uppá ástarlífið í svefnherberginu. "Þá verður einnig farið í heimsókn til nokkurra hjóna sem kunna að láta ástina lifa."

Á fimmtudaginn verður stór dagur hjá íbúunum en þá flytur nýji bæjarstjórinn,tónleikahaldarinn og þroskaþjálfarinn Grímur Atlason, ásamt stórfjölskyldu sinni til bæjarins. "Við verðum sérstaka móttökuathöfn þeim til heiðurs með dansleik þar sem tónlistarmenn úr röðum bæjarbúa sjá um stuðið," útskýrir Soffía. "Ef Grími tekst að fjölga bæjarbúum á meðan hann situr í bæjarstjórastólnum fær hann verðlaun," bætir Soffía við. "Það stendur í ráðningasamninginum," segir hún og hlær.