Draggkeppnin í Kjallaranum í kvöld

Keppt verður um draggdrottningu og draggkóng Íslands í kvöld. Keppnin verður haldin í Þjóðleikhúskjallaranum en ekki á Gauki á Stöng eins og venjan hefur verið, enda var Gauknum lokað á dögunum. Sú breyting hefur einnig verið gerð að keppnin heitir nú Draggkeppni og er rituð með tveimur g-um. Þetta er gert í samráði við Orðabók Háskólans.

„Í fyrra vorum við á Gauknum og þurftum að vísa fólki frá því staðurinn var orðinn svo fullur. Þjóðleikhúskjallarinn er aðeins minni staður þannig að við reiknum með að það verði fullt hús,“ segir Björn Gunnlaugsson, listrænn stjórnandi Draggkeppni Íslands. Miðasalan verður opnuð klukkan níu og segir Björn að þeir sem ætli að verða öruggir með sæti ættu í síðasta lagi að vera komnir þá.

„Það verður örugglega mikil stemning enda erum við með fleiri keppendur en í fyrra og fleiri titla í boði,“ segir Björn um keppnina. Hann útskýrir að í fyrra hafi verið gerð tilraun með að leyfa konum í karlagervum að keppa við hlið draggdrottninganna. „Í fyrra vissum við því ekki hvort yrði kosinn kóngur eða drottning. Það heppnaðist svo vel að í ár erum við með fjóra kónga og fjórar drottningar sem keppa,“ segir Björn.

Felix Bergsson er kynnir kvöldsins en auk keppninnar verða skemmtiatriði af ýmsum toga, leynigestir og fleira til að kæta draggunnendur.