Campo vill snúa heim

Varnarmaðurinn hárprúði Ivan Campo hjá Bolton hefur mikinn áhuga á að snúa aftur til Spánar og leika með gamla liðinu sínu Mallorca, en umboðsmaður hans sagði í samtali við spænska blaðið Marca, að Mallorca hefði áhuga á að fá hann í sínar raðir á ný.

Campo er 31 árs gamall og kom til Bolton á frjálsri sölu frá Real Madrid árið 2002. "Ég veit fyrir víst að Ivan hefði mikinn áhuga á að fara aftur til Mallorca og það yrði í raun hneyksli ef það gengi ekki eftir," sagði umboðsmaður hans. "Nú er bara að bíða og sjá hvort Bolton tekur vel í þetta," sagði hann, en samningur Campo rennur út í sumar.