Styttist í opnunarleikinn

Heimsmeistaramótið í knattspyrnu hefst í dag. Flestir sparksérfræðingar eru sammála um að Þjóðverjar vinni Kosta Ríka auðveldlega í opnunarleik HM sem fer fram í kvöld, þrátt fyrir að vera án Michael Ballack. Opnunarleikir hafa oftast verið opnir og skemmtilegir á HM og óvænt úrslit hafa oft litið dagsins ljós. Árið 1998 töpuðu Frakkar, sem þá voru gestgjafar, opnunarleiknum gegn Senegal 1-0, eitthvað sem enginn átti von á.

Þjóðverjar: Sem gestgjafar á HM þurftu þeir ekki að spila í undanriðlum HM og hafa því ekki spilað mikilvægan leik í rúm 2 ár. Þrátt fyrir það stefna Þjóðverjar hátt í keppninni og ætla sér ekkert annað en sigurinn. Michael Ballack er tilbúinn fyrir leikinn í kvöld og segist sjálfur vilja spila, en Jurgen Klinsman landsliðsþjálfari Þýskalands hefur gefið það út að hann muni hvíla Ballack í kvöld. Ballack er þó á leikskýrslu fyrir leikinn í kvöld og gæti allt gerst í þeim efnum.

Kosta Ríka: Hinn brasilískt ættaði Alex Guilmares, þjálfari Kosta Ríka, á vandasamt verk fyrir höndum fyrir leikinn í kvöld. Hans helsta stjarna, framherjinn Paolo Wanchope fyrrum leikmaður West Ham og Manchester City og markahæsti leikmaður Kosta Ríka frá upphafi, hefur verið meiddur í hné og lítið sem ekkert getað tekið þátt í æfingum liðsins. Þetta er í þriðja skiptið sem að Kosta Ríka menn taka þátt á HM. Þeirra besti árangur er að komast í 16 liða úrslit, en þangað komust þeir á heimsmeistarakeppninni á Ítalíu 1990.

Hugsanlegt byrjunarlið:

Þýskaland: Lehmann, Friedrich, Jansen, Metzelder, Huth, Borowski, Frings, Schneider, Schweinsteiger, Klose, Podolski.

Kosta Ríka: Porras, Marín, Martinez, González, Hernandez, A. Solis, Bolanos, Gómez, Sequeira, Fonseca, Wanchope.