Schola Cantorum í Akureyrarkirkju

Þriðju tónleikarnir í tónleikaröðinni Sumartónleikar í Akureyrarkirkju verða haldnir á morgun kl. 17 en þá flytur kammerkórinn Schola cantorum verk eftir Heinrich Schütz og Þorkel Sigurbjörnsson. Stjórnandi á tónleikunum er Hörður Áskelsson en meðleikari á selló er Inga Rós Ingólfsdóttir.

Kórinn var stofnaður upp úr síðustu áramótum á grunni Schola cantorum, kammerkórs Hallgrímskirkju. Kórinn hafði þá starfað við góðan orðstír í níu ár, undir stjórn Harðar Áskelssonar og haldið fjölmarga tónleika þar sem einkum var flutt tónlist frá endurreisnar- og barokktíma. Einnig var samtímatónlist áberandi í verkefnaskrá kórsins og frumflutti kórinn mörg verk eftir íslensk tónskáld.

Í kjölfar endurnýjunar kórsins voru fyrstu tónleikar hópsins haldnir í mars sl. í Hallgrímskirkju þar sem eingöngu voru flutt verk eftir Heinrich Schütz. Hinn 1. júní sl. tók svo kórinn þátt í frumflutningi á sinfóníu nr. 2 eftir Atla Heimi Sveinsson ásamt Sinfóníuhljómsveit Íslands. Á döfinni er einnig frumflutningur óratoríunnar Eddu 1 ásamt Sinfóníuhljómsveit Íslands og sálumessa eftir franska barokktónskáldið André Campra ásamt barokksveit.

Aðgangur á tónleika í Akureyrarkirkju er ókeypis.