Fékk hjartaáfall

Grínistinn frægi, Jerry Lewis, er að jafna sig á sjúkrahúsi eftir að hann fékk hjartaáfall er hann var í flugvél á leið til Las Vegas.

Lewis, sem er áttræður, var fluttur á sjúkrahús í San Diego eftir að flugvél hans lenti þar. Lewis átti að koma fram í Las Vegas en ekkert verður af því.

Að sögn upplýsingafulltrúa kappans var um vægt hjartaáfall að ræða auk þess sem hann greindist með vott af lungnabólgu. Búast læknar við því að hann nái sér að fullu.

Jerry Lewis er þekktastur fyrir samstarf sitt og Deans Martin á sjötta áratugnum. Eftir það lék hann í þekktum myndum á borð við The Ladies Man og The Nutty Professor, sem síðar var endurgerð með Eddie Murphy í aðalhlutverki.

Lewis hefur átt við ýmis veikindi að stríða undanfarna tvo áratugi en hefur þó nokkrum sinnum komið fram á sviði að undanförnu.