Fabregas og Eboue fara með til Tórínó

Cesc Fabregas og Emmanuel Eboue fara báðir með liði Arsenal til Tórínó þar sem liðið tekur á móti Juventus á miðvikudagskvöldið, en ljóst er að litlar líkur eru á því að þeir verði í liðinu vegna meiðsla. Fabregas fór á kostum í fyrri leiknum gegn Juventus, en þurfti að fara meiddur af velli eftir aðeins 15 mínútur í leik í ensku úrvalsdeildinni um helgina.

"Fóturinn á Fabregas er stokkbólginn og það er aldrei góðs viti," sagði Arsene Wenger áhyggjufullur, en hann metur líkurnar á því að þeir félagar geti spilað um 40%. Þá er ekki loku fyrir það skotið að Sol Campell verði í liði Arsenal gegn Juventus, en hann hefur ekki spilað í rúman mánuð vegna meiðsla.