Del Piero í stað Francesco Totti

Marcello Lippi þjálfari ítalska landsliðsins í knattspyrnu hefur gefið það út að líklegt sé að hann muni byrja með Alessandro Del Piero, leikmann Juventus, fremst á miðjunni í fyrsta leik ítala á HM gegn Ghana 12. júní.

Francesco Totti spilaði þessa stöðu fyrir Ítali í flestöllum leikjum undankeppninnar, en hann fótbrotnaði í leik með Roma í Febrúar. Totti hefur ekki spilað leik síðan þá og er greinilegt, ef marka má fréttir úr herbúðum ítalska liðsins, að Lippi treysti Del Piero frekar til þess að byrja, þrátt fyrir að Totti sé orðinn leikfær. Ítalir þykja líklegir til þess að tefla fram tígulmiðju með Del Piero fremstan á miðjunni fyrir aftan Luca Toni og Alberto Gilardino.