Kewell ætlar að ná HM

Forráðamenn ástralska landsliðsins eru sannfærðir um að Harry Kewell verði búinn að ná sér af þeim nárameiðslum sem hafa verið að hrjá hann undanfarið. Kewell sem er 27 ára segist ætla að ná að spila á heimsmeistaramótinu í Þýskalandi en hann meiddist gegn West Ham í úrslitaleik FA bikarkeppninnar.

Ástralir ætla sér stóra hluti á HM en þeir eru í riðli með Brössum, Japönum og Króatíu. "Markmið okkar er að sigra Japan og Króatíu en markmiðið í leiknum gegn Brössum er að ná góðum úrslitum," segir Kewell.