Russell í Tarantino-mynd

Margir hrollvekjuaðdáendur bíða eflaust spenntir eftir kvikmyndatvíeykinu Grind House sem er skrifað og leikstýrt af félögunum Robert Rodriguez og Quentin Tarantino en þetta eru tvær 75 mínútna hryllingsmyndir sem settar eru saman í eitt.

Kvikmyndahluti Rodriguez, Planet Death, var tilkynntur á Comic Con-hátíðinni sem nú stendur yfir í San Diego og voru blaðamenn yfir sig hrifnir af því sem þeir sáu. Tarantino er reyndar ekki byrjaður að taka upp sinn hluta, sem gengur undir nafninu Death Proof, en upplýsti hvaða konur yrðu í mikilli hættu, þeirra á meðal er Rosario Dawson sem lék einmitt í Sin City.

Flestir þeirra sem mættu á fund Rodriguez og Tarantino bjuggust því við að leikstjórinn óðamála myndi halda sig til hlés en eins og Íslendingar vita hentar það ekki honum. Leikstjórinn tók sér góðan tíma í að undirbúa viðstadda þegar hann tilkynnti hver myndi leika óþokkann í Death Proof. Tarantino hefur löngum haft nef fyrir skemmtilegu vali á karlleikurum og muna flestir eftir því hvernig hann reisti John Travolta upp úr öskustónni í kvikmyndinni Pulp Fiction. "Sá sem varð fyrir valinu að þessu sinni lék Snake Plissken," sagði Tarantino og setti hljóðan.

Þetta er auðvitað Kurt Russell sem margir telja að þurfi virkilega á einhverjum smelli að halda til að bjarga arfleifð sinni en öllu má vera ljóst að samstarf þessara tveggja á eftir að verða um margt forvitnilegt. Til gamans má geta að Tarantino lauk við handritið hér á landi og segja kunnugir að það hafi verið í Bláa lóninu.