Hamas-liðar varaðir við að verja hryðjuverk

Bandarísk stjórnvöld hafa varað Hamas-hreyfinguna við því að verja hryðjuverk. Formælandi samtakanna sagði í gær að sjálfsvígsárás í Tel Aviv í Ísrael í gær hefði verið lögmæt sjálfsvörn.

9 féllu í sjálfsvígssprengjuárás 16 ára liðsmanns Heilags stríðs fyrir framan fjölfarinn skyndibitastað í gær og er árásin sú mannskæðasta í Ísrael í rúmt ár. 50 særðust í árásinni.

Hamas-samtökin leiða nú ríkisstjórn Palestínumanna. Formælandi þeirra sagði í gær að hermdarverkið væri lögmæt sjálfsvörn gegn hernámi Ísraela. Abbas, forseti Palestínumanna sagði það hins vegar víðs fjarri og fordæmdi árásina.

Bandaríkjastjórn fordæmir árásina og segir það hlutverk heimastjórnar Palestínumanna að koma í veg fyrir hryðjuverk. Kofi Annan, framkvæmdastjóri Sameinuðu þjóðanna, hvatti í gær heimastjórnina til að fordæma sjálfsvígsárásir.

Annan sagði kvartetinn svokallaða, Bandaríkjamenn og Rússa auk fulltrúa Evrópusambandsins og Sameinuðu þjóðann ætla að funda um stöðuna fyrir botni Miðjarðarhafs í New York þann níunda maí næstkomandi.

17 ára palestínskur unglingur féll þegar Ísraelsher gerði flugskeytaárás á bæinn Beit Lahiya í gærkvöldi. Herinn gerði einnig árás á meintar bækistöðvar palestínskra vígamanna í Gaza-borg, en að sögn talsmanns palestínskra yfirvalda féll enginn í þeirri árás. Óttast er að með árásunum í gær sé hafin ný hrina árása fyrir botni Miðjarðarhafs.