Japan

Japanir eru í F riðli með Brasilíumönnum, Króötum og Áströlum. Þeir eru í 18. sæti á styrkleikalista FIFA. Það verður erfitt fyrir þá að komast upp úr riðlinum en alls ekki ómögulegt.

Japanir eru nú undir stjórn Zico sem var á sínum tíma einn allra besti knattspyrnumaður heims. Hann hefur hins vegar ekki verið mjög sannfærandi sem þjálfari en skilaði þó sínu liði á HM. Ef Japan fellur út í 16 liða úrslitum eftir hetjulega baráttu verða áhangendur sáttir.

Zico tók við af Frakkanum Philippe Troussier. Eins og áður hefur komið fram þá þótti Japanska liðið ekkert sérstaklega sannfærandi í undankeppninni. Goðsögnin Zico hefur hins vegar HM til að sýna mátt sinn sem þjálfari.

Sóknarmaður Yokahama Tatsuhiko Kubo var ekki valinn í 23 manna HM hópinn. Í hans stað valdi Zico Seiichiro Maki sem er með mun minni leikreynslu.

Sinji Ono sem snéri heim í J deildina frá Feyenoord er hugsanlega alhliða besti leikmaður Japana. Hidetoshi Nakata leikmaður Bolton er hins vegar þeirra stærsta stjarna.

Fyrirliði: Tsuneyasu Miyamoto

Lykilmaður: Sinji Ono

Gæti slegið í gegn: Shunsuke Nakamura