Gafst upp á kuldanum á Íslandi og fann paradís á jörðu

„Mér leiddist á Íslandi enda er hér kalt og dimmt meirihluta árs," segir hin 23 ára Monika Klonowski. Erfitt er annað en að vera sammála henni í kuldakastinu sem ríður yfir landið þessa dagana. Monika er nýkomin heim eftir að hafa verið í tæp tvö ár á eyjunni Roatan í Karíbahafinu þar sem hún vinnur sem köfunarkennari.

„Þetta var nú ekki planið til að byrja með. Ég fór sem skiptinemi til Kosta Ríka í tvö ár þar sem við heimsóttum þessa eyju. Þetta er fallegasti staður sem ég hef farið á, hvítar strendur og grænblár sjór," segir Monika en eftir að hún kláraði spænskunám sitt í Kosta Ríka átti hún tvo mánuði aflögu áður en farmiði hennar til Íslands tók gildi. „Þannig að ég skellti mér bara í köfunarnám á Roatan sem er ódýrasti staður í heimi til að kafa á."

Eftir það var Monika komin með kafarabakteríuna, hún henti flugmiða sínum til Íslands og ákvað að setjast að í Karíbahafinu. Hún er komin hingað heim núna en ætlar að flytja alfarið út eftir áramót enda komin með innfæddan upp á arminn og því verður ekki aftur snúið.

Það sem heillaði Moniku við þessa eyju voru ekki bara hvítu strendurnar, sjórinn og veðrið sem ávallt er gott heldur líka það að þar er svo ódýrt að lifa. „Ég leigi hús við ströndina á rúmar 17.000 íslenskar krónur á mánuði sem er með rafmagni og hita," segir Monika en húsið hennar er lítið einbýlishús.

Margt hefur á daga Moniku drifið síðan hún byrjaði að búa á eyjunni og varð hún meðal annars fyrir þeirri ólukku að fá malaríu. „Ég hélt að ég væri að deyja, Þetta er það versta sem ég upplifað," segir Monika en fjölskylda og vinir voru áhyggjufullir á Íslandi þar sem Monika leyfir þeim að fylgjast með sér gegnum bloggsíðu sína þar sem símasamband er ekki upp á marga fiska á eyjunni. ,„Ég gat ekki bloggað í viku og foreldrar mínir því orðnir frekar áhyggjufullir."

Monika er pólsk að uppruna en er eini meðlimur fjölskyldu sinnar sem er fæddur á Íslandi. Fjölskyldan hennar var með fyrstu pólsku innflytjendum á Íslandi. „Ég er mjög ánægð þarna úti og tel mig hafa fundið mína paradís á jörðu. Lífið er svo rólegt og þægilegt þar, ekki svona mikið stress eins og hér á Íslandi," segir þessi ungi ferðalangur að lokum.