Mikil upphefð fyrir lítinn veitingastað við höfnina

Veitingastaðurinn Sægreifinn, og sérstaklega humarsúpan sem prýðir matseðil hans, hlaut á sunnudag lofsamlega umfjöllun í þeim hluta New York Times sem helgaður er ferðalögum. Þetta ætti ekki að koma þeim sem stundað hafa staðinn á óvart, en hann hefur notið mikilla vinsælda.

Sérstaklega hafa miðbæjarbúar farið fögrum orðum um veitingarnar. Sægreifinn er einn þeirra veitingastaða sem glæða Reykjavíkurhöfn lífi, en þar má bæði njóta tilbúinna fiskrétta og kaupa sér spriklandi ferskan fisk í soðið.

Í umfjölluninni í dagblaðinu virta segir meðal annars að hina fullkomnu humarsúpu sé að finna á Sægreifanum, súpan sé hreint út sagt ljúffeng og það fyrsta sem fólk eigi að láta inn fyrir varir sínar þegar komið er til Reykjavíkur. Þar segir jafnframt að miðað við verð og gæði súpunnar sé hreinlega ekki hægt að gera betur en Sægreifinn.

Kjartan Halldórsson, eigandi Sægreifans, hafði ekki fengið tækifæri til að lesa umfjöllunina þegar Fréttablaðið hafði samband við hann. Stuttur útdráttur úr greininni vakti þó mikinn fögnuð greifans og fyrrverandi sjómannsins, og kvaðst Kjartan hæstánægður með umfjöllunina.

„Ég er náttúrulega gríðarlega ánægður með þetta. Það er mikið atriði að fá svona umfjöllun, og sér í lagi hjá svona blaði. Þetta er bara mikil upphefð,“ sagði hann. Aðspurður hvort dómur New York Times væri í samræmi við þau viðbrögð sem Kjartan fær hjá viðskiptavinum sínum sagði hann svo vera. „Ég fæ alltaf góða umfjöllun og viðtökur hjá fólki, og er voðalega hamingjusamur með það,“ sagði Kjartan.