Verð að vera þolinmóður

Sænska staðarblaðið Hallandsposten gerði framgöngu Gunnars Heiðars Þorvaldssonar hjá Hannover 96 að umfjöllunarefni í gær en hann var áður á mála hjá Halmstad og varð í fyrra markakóngur sænsku deildarinnar. Hann hefur hins vegar ekki verið valinn í hópinn hjá Hannover í fyrstu tveimur leikjum liðsins í þýsku úrvalsdeildinni.

"Ég verð að vera þolinmóður," sagði Gunnar Heiðar. "Þjálfarinn er svolítið sérstakur og á sína uppáhaldsleikmenn hjá félaginu sem þýðir að það er enn erfiðara fyrir vikið að koma sér í liðið." Eyja­­peyinn stóð sig þó vel á undirbúningstímabilinu, skoraði sjö mörk í sex leikjum og nú síðast þrennu í æfingaleik í vikunni. "Ég vona að hann láti undan þrýstingnum og gefi mér tækifæri," sagði Gunnar.