bin Laden heltekinn af Whitney

Hryðjuverkaleiðtoginn Osama bin Laden var heltekinn af söngkonunni Whitney Houston fyrir nokkrum árum. bin Laden var svo ákveðinn í að ná í söngkonuna að hann íhugaði að myrða eiginmann hennar, söngvarann Bobby Brown. Þetta kemur fram í nýrri bók Kola Boof, konu sem heldur því fram að bin Laden hafi haldið henni nauðugri sem kynlífsþræl. Boof segir al-Qaeda leiðtogann hafa talað stanslaust um Whitney.

Hann sagðist ekki geta staðist Whitney Houston, talaði stanslaust um hve falleg hún væri og hvað bros hennar væri fallegt. Þá sagði hann að hún væri í raun sannur fylgismaður Islam, en hún væri heilaþvegin af bandarískri menningu og eiginmanninum. Osama talaði um að láta myrða hann, eins og það væri eðlilegt að láta myrða eiginmenn kvenna.

Kola er 37 ára og frá Súdan. Diary of a Lost Girl er sjálfsævisaga hennar en þar kemur allt þetta fram. Rithöfundurinn segir að Osama hafi nauðgað henni fyrir tíu árum og haldið henni fanginni í fjóra mánuði. Auk þess fylgir það sögunni að hryðjuverkaleiðtoginn hafi geymt eintök af Playboy í skjalatösku sinni hvert sem hann fór.