Hirðlögfræðingar handa McCartney og Mills

Sir Paul McCartney og lafði Heather Mills hafa ráðið til sín bestu skilnaðarlögfræðinga Bretlands. McCartney hefur fengið Fionu Shackleton sem Karl Bretaprins réð þegar hann skildi við Díönu prinsessu og Mills hefur fengið til liðs við sig lögfræðinginn Anthony Julius en hann sá um mál Díönu prinsessu. Þykir því nokkuð ljóst að hvorugt þeirra ætli að gefa nokkuð eftir og má reikna með erfiðum skilnaði þegar öll kurl verða komin til grafar.

Þegar McCartney og Mills gengu í hjónaband gerðu þau engan kaupmála og bendir allt til þess að Mills muni krefjast ansi hárra upphæða frá bítlinum fyrrverandi en hann er talinn eiga eignir upp á 800 milljónir punda eða rúmlega hundrað milljarða íslenskra króna. Hjónin tilkynntu skilnaðinn í maí síðastliðnum og sögðu ástæðuna meðal annars vera hnýsni fjölmiðla í einkalíf þeirra. Þau sögðust þó enn ætla að vera vinir en síðan hefur mikið vatn runnið til sjávar og kom Heather Mills meðal annars að lokuðum dyrum í vikunni þegar hún hugðist sækja fund á heimili McCartneys í London.