Ingólfur á krossgötum

Það hefur lítið farið fyrir Ingólfi Hannessyni síðustu þrjú árin. Eftir að hafa starfað sem íþróttastjóri Ríkissjónvarpsins ákvað hann að söðla um og hefur búið í Sviss og starfað hjá Sambandi evrópskra sjónvarpsstöðva. Þar hefur hann fengist við samningsgerð og undirbúning fyrir mót í innanhúss- og vetraríþróttum. Um næstu mánaðarmót rennur út þriggja ára starfssamningur Ingólfs hjá EBU og hann stendur því á krossgötum um þessar mundir.

„Um mánaðarmótin lýkur líka þriggja ára launalausu leyfi mínu hjá Ríkisútvarpinu og ég er þessa dagana að gera upp við mig hvað tekur við,“ segir Ingólfur sem hefur dvalist á Íslandi að undanförnu. „Mér hefur verið boðið fast starf úti hjá EBU og í því felst bæði stöðuhækkun og starfstitilsbreyting,“ segir Ingólfur sem býst við að taka ákvörðun um framtíðina í lok vikunnar. Honum hafa auk þessa verið gerð fleiri starfstilboð erlendis og á því síður von á því að taka aftur við fyrri stöðu hjá RÚV. „Sú staða er líka ágætlega mönnuð af mínum góða félaga Samúel Erni Erlingssyni. Hann hefur staðið sig með mikilli prýði.”

Aðspurður segir Ingólfur umrætt starfstilboð hjá EBU vera mjög áhugavert, það sé í raun algert draumastarf á þessum vettvangi. Taki Ingólfur við starfinu mun hann hafa umsjón með átta alþjóðlegum samtökum og stýra samningsgerð upp á nokkra milljarða. Hann viðurkennir þó að starfið í Sviss bitni vissulega á fjölskyldulífinu.

„Ég er nú þannig settur að konan mín er að kenna á Íslandi í vetur, sonur minn er í Háskólanum og dóttir mín er í Danmörku að klára læknisfræði. Þetta er sem sagt Sviss, Ísland og Danmörk. Svo er bara reynt að sameina þetta einhvern veginn. Reynslan hefur nú samt sýnt mér að hamingjan felst ekki í flugferðum,“ segir Ingólfur Hannesson.