Alþýðuleg stjörnuleikkona vekur hrifningu

Stórleikkonan Cate Blanchett er stödd hér á landi ásamt eiginmanni sínum, Andrew Upton, og tveimur sonum þeirra. Hún er jafn falleg og í kvikmyndunum, sagði heimildamaður blaðsins á Búðum. Blanchett lét lítið fyrir sér fara og var mörgum ekki ljóst að þarna væri á ferð heimsfræg kvikmyndastjarna en rólegt var á Búðum um helgina enda áttu hvers kyns útihátíðir hug og hjörtu landsmanna.

Samkvæmt heimildum Fréttablaðsins keypti leikkonan nokkra stóla á Hótel Búðum eftir listamanninn Sigga á Risi en þeir eru þrífóta með lambakskini. Leikkonan naut í gær lífsins á Snæfellsnesi og var væntanleg aftur á Búðir í kvöldverð.

Blanchett fór á Innipúkann síðastliðið sunnudagskvöld og sá þar rjómann úr íslensku tónlistarlífi, meðal annars Mugison og Ghostigital. Samkvæmt heimildarmanni blaðsins mætti Blanchett snemma og hafði fest kaup á miða áður. Nærvera hennar fór ekki framhjá neinum á Nasa en leikkonan krafðist engrar sérmeðferðar og þakkaði kærlega vel fyrir sig á leiðinni út.

Blanchett snæddi einnig kvöldverð á veitingastaðnum Við Tjörnina, þjónunum þar til mikillar gleði. Fæstir þeirra sem snæddu á staðnum könnuðust við leikkonuna en einn þjónanna var aðdáandi leikkonunnar og hoppaði hæð sína af kæti að sögn viðstaddra. Samkvæmt heimildum Fréttablaðsins er ekki óalgent að hinir ríku og frægu leggi leið sína á þennan veitingastað á Templarasundi þannig að veitingafólkið er öllu vant. Reyndar var ekkert borð laust fyrir Blanchett en leikkonunni þótti ekki mikið tiltökumál að bíða eftir að röðin kæmi að sér og var hún mjög sátt með máltíðina.

Blanchett er einhver virtasta leikkona Hollywood um þessar mundir enda hlaut hún Óskarsverðlaunin fyrir túlkun sína á Katharine Hepburn í The Aviator. Hún leikur meðal annars stórt hlutverk í nýjustu mynd Steven Soderbergh, The Good German, þar sem George Clooney er í aðalhlutverki og þá hefur verið tilkynnt um kvikmyndina The Curious Case of Benjamin Button en þar mun hún leikur hún á móti sjálfum Brad Pitt en leikstjóri er David Fincher.