Damon Albarn með nýja hljómsveit

Tónlistarmaðurinn og Íslandsvinurinn Damon Albarn er búinn að stofna nýja hljómsveit. Damon hefur undanfarið unnið að sólóplötu í samstarfi við Danger Mouse en hefur nú ákveðið að taka sér hlé frá því verkefni. Blur-aðdáendum verður ekki að ósk sinni um að Damon fari aftur að vinna með Graham Coxon að nýju Blur-efni.

Nei, drengurinn hefur hóað í bassaleikarann Paul Simonon úr The Clash og gítarleikarann Simon Tong úr The Verve í nýju hljómsveitina. Auk þeirra verður Tony Allen á trommunum. Hljómsveitin hefur enn ekki fengið nafn en áætlað er að fyrsta smáskífan verði gefin út í október. Fyrsta stóra platan, sem fengið hefur nafnið The Good the Bad and the Queen, verður svo gefin út í janúar á næsta ári. Damon og félagar hafa lokið við upptökur á plötunni, sem er einhvers konar "konsept"-plata um það að búa í London.