Ljóðabók með bulltextum

Grínistinn Þorsteinn Guðmundsson er að leggja lokahönd á ljóðabók sem hann vonast til að geta gefið út fyrir verslunarmannahelgina. Bókina vinnur Þorsteinn með Eiríki Erni Norðdahl sem skrifar einnig formála að bókinni. Titillinn er nokkuð sérstakur, Barkakýli úr tré.

"Titillinn lýsir hæfileikum höfundar í ljóðagerð. Þetta eru bullljóð og fyrirsagnir, nokkuð nálægt því sem ég hef verið að gera í uppistandinu," segir Þorsteinn. "Það væri fínt að koma bókinni út fyrir verslunarmannahelgina því þá getur maður reynt að pranga henni inn á drukkin börn. Það væri ekki ónýtt að labba um með bókina í hjólbörum til að selja hana," segir Þorsteinn sem er þó ekki viss um að sér takist að koma bókinni út í næstu viku.

"Fólk má alveg senda mér frjáls framlög ef það vill ýta á að bókin komi út."

Þorsteinn er nýkominn heim frá Grikklandi þar sem upptökur fóru fram á Námsmanninum, auglýsingu fyrir námsmannaþjónustu KB-banka.

"Við vorum úti um allt, ég og Reynir Lyngdal leikstjóri. Ég var bara að spóka mig um í tóga-klæðum með ferðahandbók og náði að sannfæra marga um að ég vissi eitthvað um Grikkland."