Dragdrottningar á Grandrokk

Spurningakeppnin Drekktu betur á Grand rokk verður með óvenjulegum hætti á föstudaginn eftir viku, hinn 28. júlí. Þá munu dragdrottningarnar Keikó og Roxie verða í hlutverki spyrla og spurningar þeirra tengjast flestar samkynhneigð í ljósi sögunnar.

„Við erum með dragkeppnina 9. ágúst næstkomandi og fengum þarna tækifæri til að taka smá þjófstart á keppnina,“ segir dragdrottningin Keikó. „Við ætlum að reyna að kveikja í fólki fyrir keppnina og spurningarnar verða eflaust margar í flóknari kantinum, eins og venjan er í þessum keppnum á Grand rokk,“ segir Keikó.

Keikó segir að fastagestir á Drekktu betur hafi vissulega erindi á keppnina eftir viku, því allir muni vita nóg til að vera með. „Fólk má endilega mæta í dragi ef það vill. Við Roxie verðum alla vega í fullum skrúða og reynum að skemmta fólkinu.“